Меркель мен Обама Украина мен Ресейді талқылайды

9 ақпанда Вашингтонда АҚШ президенті Барак Обама Германия канцлері Ангела Меркельмен келіссөздер жүргізеді, деп хабарлайды The Associated Press Ақ үйдің есебіне сілтеме жасап.

Обама мен Меркель Украинадағы жағдайды талқылайды. Өткен аптада олар ресейшіл сепаратистер бірқатар шабуыл әрекеттерін бастаған елдегі зорлық-зомбылықтың өсуіне алаңдаушылық білдірді.

Агенттік сілтеме жасаған Обаманың көмекшілерінің сөзіне қарағанда, АҚШ пен Германия басшылары сепаратистерді қолдағаны және бейбіт келісімдердің шарттарын орындаудан бас тартқаны үшін Ресей жауап беруі керек деп келісті.

Вашингтондағы келіссөздерде терроризмге қарсы тұру, «Ислам мемлекеті» ұйымының қоқан-лоққылары, Ауғанстандағы жағдай және Иранмен қарым-қатынас мәселелері де талқыланады.

Олар экономикалық өсу, сауда, климат және Германияның G7-ге алдағы төрағалық мәселелерін талқылайды, деп жазады BBC News.