Порошенко Украинанын "Улуу Ата Мекендик согуш" термининен баш тартуусу боюнча мыйзамга кол койду

Сүрөт: Украина Президентинин басма сөз кызматы

Украинанын президенти Петро Порошенко “1939-1945-жылдардагы Экинчи дүйнөлүк согушта нацизмди жеңүүнү түбөлүккө калтыруу жөнүндө” мыйзамга кол койду, ага ылайык, “Улуу Ата Мекендик согуш” түшүнүгү “Экинчи дүйнөлүк согуш” термини менен алмаштырылды. Тиешелүү мыйзамдын тексти украин мамлекет башчысынын сайтында жарыяланды.

Документте Украинанын “1941-1945-жылдардагы Улуу Ата Мекендик согуштагы Жеңишти түбөлүккө калтыруу жөнүндө” мыйзамы күчүн жоготту деп таанылып, 9-май “Экинчи дүйнөлүк согушта нацизмди жеңген күн” деп аталат.

Мыйзамда ошондой эле “Экинчи дүйнөлүк согуш” деген терминди колдонуу жана “Улуу Ата Мекендик согуш” деген терминден баш тартуу сунушталууда. Экинчи дүйнөлүк согушта курман болгондордун элесине таазим кылууда мыйзамга ылайык, советтик символдорду колдонуу да жокко чыгарылат.

Кошумчалай кетсек, Украина улутчулдарынын уюмунун – Украина козголоңчу армиясынын (ОУН-УПА) Украинадагы ишмердүүлүгү өлкөнүн көз карандысыздыгы үчүн күрөш катары таанылган. Тиешелүү мыйзамга өлкө президенти Петр Порошенко кол койгонун анын басма сөз кызматы билдирди.

"Мыйзам 20-кылымдагы Украинанын көз карандысыздыгы үчүн күрөштү мамлекет тарабынан таанууну камсыз кылат жана 20-кылымда Украинанын көз карандысыздыгы үчүн күрөштүн катышуучуларынын укуктук статусун аныктайт", - деп айтылат документтин түшүндүрмө катында.