БУУнун башчысы Украинанын аймактык бүтүндүгүн бузбоого үндөйт

БУУнун баш катчысы Украинанын биримдигин, аймактык бүтүндүгүн жана өлкөдөгү туруктуулукту бузган иш-аракеттерди токтотууну талап кылды. Ал 17-апрелдеги Женева Билдирүүсүнүн жоболорун ишке ашырууга чакырды.

БУУнун башчысы Пан Ги Мун басма сөзгө шилтеме жасап, Украинада акыркы жумаларда диалогго караганда зордук-зомбулук көп болуп жаткандыгын белгиледи.

"Украинанын биримдигин, аймактык бүтүндүгүн жана өлкөдөгү стабилдүүлүктү бузууну көздөгөндөрдүн баарын мындай аракеттерди токтоосуз токтотууга чакырам", - деди Пан Ги Мун. Өз кезегинде Киев бийлиги мындай аракеттерге максималдуу сабырдуулук менен жана Украинанын мыйзамдарынын, ошондой эле адам укуктары боюнча эл аралык стандарттардын алкагында жооп бериши керек.

БУУнун башчысы бардык тараптарды 17-апрелде Женевада көрсөтүлгөн компромисстик духту жандандырууга жана ал жерде жетишилген келишимдин жоболорун аткарууга чакырды.

Пан Ги Мундун айтымында, өлкөнү жалпы масштабдагы кризиске ооп кетүүдөн сактоого мүмкүнчүлүк дагы деле бар.

"Украинанын бардык элине нааразычылыктарын жана тилектерин тынчтык жолу менен, анын ичинде 25-майда өтө турган президенттик шайлоого катышуу менен билдирүүгө чакырам", - деп кошумчалады башкы катчы.