Обама мен Кастро сенбіде кездеседі

АҚШ пен Куба билігі АҚШ президенті Барак Обама жұмада Панамада басталатын Америка саммитіндегі тарихи кездесу алдында Кубалық әріптесі Рауль Кастромен телефон арқылы сөйлесті деп хабарлайды.

Ақ үйдің жоғары лауазымды қызметкерінің айтуынша, екі президент сәрсенбіде, президент Обама Ямайка мен Панамаға кетер алдында сөйлескен. Бұл ақпаратты Кубаның ұлттық жаңалықтар агенттігі директорының орынбасары Хорхе Леганоа да растады.

Ақ үйдің қауіпсіздік жөніндегі кеңесшісінің орынбасары Бен Родс әңгіме барысында екі ел басшыларының АҚШ-Куба дипломатиялық қатынастарын қалпына келтіру әрекеттерін талқылады деп мәлімдеді. Сонымен бірге, Обама мен Кастро елдер арасында әлі де келіспеушіліктер бар екенін мойындады.

Родстің сөзіне қарағанда, Обама Кубадағы азаматтық қоғамның қудалауға ұшырағанын мойындайды, бірақ ол Куба билігімен қарым-қатынас саясаты оң нәтиже беруі мүмкін деді.

Президент Обама Панама астанасына бейсенбіге қараған түні коммунист Куба алғаш рет шақырылған Америка саммитіне қатысу үшін келді.

Екі лидердің арасында ресми кездесу жоспарланбағанымен, біздің Ақ үйдегі тілшіміздің айтуынша, екі елдің билігі Обама мен Кастро «сөйлесуді» жоспарлап отырғанын растады.

Бейсенбі күні кешке АҚШ Мемлекеттік хатшысы Джон Керри саммит аясында Кубаның сыртқы істер министрімен кездесті. Бұл бірнеше онжылдықтағы екі ел үшін осындай жоғары деңгейдегі алғашқы тікелей кездесу болды.

Мемлекеттік департаменттің жоғары лауазымды қызметкерінің айтуынша, Керридің Куба Сыртқы істер министрі Бруно Родригеспен кездесуі «өте сындарлы» болды және екі жақ та ілгерілеуді атап өтті.

Ақпарат көзі келіссөздер туралы қосымша мәліметтер берген жоқ, бірақ тараптар «даулы мәселелерді шешу бойынша жұмысты жалғастыруды» жоспарлап отырғанын атап өтті.

Мемлекеттік департамент сонымен қатар Twitter-де Керри мен Родригестің күлімсірей қол алысып тұрған суретін жариялады.

Төрт ай бұрын Кубамен қарым-қатынасты қалпына келтіру әрекеттерін жариялаған президент Обама бейсенбіде Ямайкада Кубаны АҚШ терроризмді демеушілер деп санайтын елдер тізімінен шығару туралы шешім қабылдайтынын мәлімдеді.

Кариб бассейніндегі Кубаның ең жақын көршісі Ямайкаға барған кезде президент Обама сонымен бірге Мемлекеттік департамент Кубаның халықаралық аренадағы іс-әрекеттері туралы есеп беру жұмысын аяқтағанын және оның көмекшілерінен осы мәселе бойынша соңғы ұсыныстарды күтіп отырғанын айтты.

Сенаттың Халықаралық қатынастар комитетінің жетекші демократы Мэриленд штатынан сенатор Бен Кардин бұл ұсыныс Кубаның терроризмнің демеушісі мәртебесін алып тастауды қолдайтынына сенім білдірді. «Америка Құрама Штаттарында Кубамен қарым-қатынасты нөлден бастаудың ерекше мүмкіндігі бар», - деді ол.