БҰҰ басшысы Украинаның аумақтық тұтастығын бұзбауға шақырады

БҰҰ Бас хатшысы Украинаның бірлігіне, аумақтық тұтастығына және елдегі тұрақтылыққа нұқсан келтіретін әрекеттерді тоқтатуды талап етті. Ол 17 сәуірдегі Женева декларациясының ережелерін орындауға шақырды.

БҰҰ басшысы Пан Ги Мун баспасөзге сілтеме жасай отырып, соңғы апталарда Украинада диалогтан гөрі зорлық-зомбылық көбірек болғанын атап өтті.

«Украинаның бірлігіне, аумақтық тұтастығына және елдегі тұрақтылыққа нұқсан келтіргісі келетіндердің барлығын мұндай әрекеттерді дереу тоқтатуға шақырамын», - деді Пан Ги Мун. «Киев билігі өз тарапынан мұндай әрекеттерге барынша ұстамдылықпен және Украина заңдары, сондай-ақ халықаралық адам құқықтары стандарттары аясында жауап беруі керек».

БҰҰ басшысы барлық тараптарды 17 сәуірде Женевада көрсетілген ымыраға келу рухын жаңғыртуға және онда қол жеткізілген келісімнің ережелерін орындауға шақырды.

Пан Ги Мунның пікірінше, елдің ауқымды дағдарысқа ұшырауының алдын алуға әлі де мүмкіндік бар.

«Мен Украинаның барлық халқын 25 мамырда өтетін президенттік сайлауға қатысу арқылы да өз наразылықтарын және тілектерін бейбіт жолмен жеткізуге шақырамын», - деп қосты Бас хатшы.